ԱՐՍԵՆ ԱՌՈՒՍՏԱՄՅԱՆ

Ճարտարապետ

Ծնվել է 1948թ. հուլիսի 28-ին, Երևանում: 1978թ. ավարտել է Երևանի պոլիտեխնիկական ինստիտուտի ճարտարապետաշինական ֆակուլտետը, 1992թ.՝ Մոսկվայի ճարտարապետության և քաղաքաշինության տեսության ՀամԳՀԻ: 1971-75թթ աշխատել է Երևաննախագիծ ինստիտուտում, 1975-80թթ՝ «Սոյուզսպորտ նախագիծ» ինստիտուտի Երևանի տարածքային արվեստանոցում: 1976թ-ից Հայաստանի ճարտարապետների միության անդամ է: 1981թ-ից դասավանդում է Երևանի պետական ճարտարապետաշինարարական համալսարանում (2003թ-ից՝ պրոֆեսոր): 2000-12թթ եղել է Քաղաքաշինության ԳՀ և նախագծային ինստիտուտի տնօրենը: 1988-92թթ, որպես «Արուճ» միջազգային կազմակերպության նախագահ, Մոսկվայի ճարտարագիտաշինական ինստիտուտի և Արևմտյան Բեռլինի տեխնիկական համալսարանի համագործակցությամբ, ղեկավարել է Արուճ քաղաքի հատակագծումը (1993թ.): Նրա նախագծերով կառուցվել են Դոնի Ռոստովում հեծանվատրեկ (1978թ.), Երևանի ԵՊԻ մանկապարտեզը (1980թ.), Մ.Մաշտոցի անվան համալսարանի շենքը (1981թ.), Հրազդանի Հիդրոերկրաբանական արշավախմբի շենքը և հանգստյան տունը (երկուսն էլ` 1980թ.), Ալավերդիի Սբ. Գրիգոր Նարեկացի եկեղեցին (2000թ.): Հեղինակել է ավելի քան 80 գիտական աշխատություններ, հոդվածներ, որոնցից է՝ «Քաղաքաշինությունը սեյսմաակտիվ շրջաններում» (1998թ.): 2011թ. արժանացել է ՀՀ քաղաքաշինության նախարարության ոսկե մեդալի, 2015թ.՝ ՀՀ վարչապետի շնորհակալագրի: