ՊՈՂՈՍ ԶՈՒՐԱԲՅԱՆ

Ճարտարապետ, ճարտարագետ

Ծնվել է Շուշիում: 1898թ. ավարտել է Սանկտ Պետերբուրգի քաղաքացիական ճարտարագետների ինստիտուտը: 1899-1917թթ եղել է Թիֆլիսի շրջանային ճարտարապետ, 1917-19թթ` Վրացական քաղաքների միության, 1921-38թթ` Վրաստանի առողջապահական ժողկոմատի կուրորտային վարչության գլխավոր ճարտարագետը: 1919թ-ից պարբերաբար դասավանդել է Թիֆլիսի տարբեր ուսումնական հաստատություններում: Նախագծել և Թիֆլիսում կառուցել է 36 եկամտաբեր տներ (1899-1917թթ), Ներսիսյան դպրոցի նոր շենքը (1909թ., համահեղինակ, այժմ` Ինդուստրիալ ինստիտուտ), Վոլգա-Կամսկ դրամատան Թիֆլիսի բաժանմունքը (1910թ., այժմ` Վրաստանի ազգային գրադարան), Մ.Արամյանի և Հ.Ձուբալովի անվան հիվանդանոցների համալիրը Հավլաբարում, Ալեքսանդրյան մանկաբարձ-մանկաբուժական հիվանդանոցը (երեքն էլ` 1910թ.), Երևանում` քաղաքային երկհարկ հիվանդանոցը (1910թ., երրորդ հարկն ավելացվել է 1930թ.), Էջմիածնում` Նոր վեհարանը (1910-14թթ) և գրադարանը (մատենադարան, 1911թ.), Աբասթումանի «Արազինդո» հակատուբերկուլոգային առողջարանը (1924-28թթ), «Չայ Գրուզիի» հանգստյան տունը Գագրայում (1936թ.), հանգստյան տներ` Բորժոմում, Սուրամում, Ցեմիում, Գուդաուտայում և այլն: Մահացել է Թբիլիսիում: