Էդվարդ Վարդանյան

Գեղանկարիչ

15 ապրիլ, 1946 - 30 մայիս, 2024

Ծնվել է ՀՀ Թալին քաղաքում: 1976թ. ավարտել է Երևանի գեղարվեստաթատերական ինստիտուտի գեղանկարչության բաժինը: 1977թ-ից մասնակցել է հանրապետական և միջազգային ցուցահանդեսների: 1978թ-ից դասավանդել է Երևանի գեղարվեստի պետական ակադեմիայում, որտեղ 1995-2008թթ և 2012թ-ից եղել է կերպարվեստի ֆակուլտետի դեկանը (2004թ-ից՝ պրոֆեսոր): 1982թ-ից եղել է Հայաստանի նկարիչների միության անդամ: Հեղինակել է «Առաջին ձյունը» (1984թ.), «Արտամեդի խնձորները» (1989թ.), «Կանչ» (1989թ.), «Աննա Ախմատովայի դիմանկարը» (1989թ.), «Արթմնի երազ» (1989թ.), «Խաչիկ Դաշտենցի դիմանկարը» (2005թ.) և այլ կտավներ: Մասնակցել է մի շարք հանրապետական և միջազգային ցուցահանդեսների, Երևանում հանդես եկել անհատական ցուցահանդեսներով (1999թ., 2003թ., 2006թ., 2011թ., 2016թ.): Նկարները գտնվում են Հայաստանի, Ռուսաստանի, Ուկրաինայի պետական թանգարաններում և մասնավոր հավաքածուներում (Ֆրանսիա, Գերմանիա, ԱՄՆ, Ֆինլանդիա, Անգլիա, Սիրիա, Կանադա և այլուր): 2006թ. արժանացել է Հայաստանի մշակույթի վաստակավոր գործչի կոչման: Մահացել է Երևանում։