Հելբերտ Ասատրյան
Դուդուկահար, շվիահար
Ծնվել է 1994թ. մայիսի 17-ին, ՀՀ Գյումրի քաղաքում: Ավարտել է Երևանի Պ.Չայկովսկու անվան միջնակարգ մասնագիտական երաժշտական դպրոցի շվիի և դուդուկի դասարանները (դասատուներ՝ Ս.Երկնափեշյան. Գ․Դաբաղյան): 2010-14թթ սովորել է Երևանի Կոմիտասի անվան պետական կոնսերվատորիայում: 2015-17թթ ծառայել է Արցախի պաշտպանության բանակում: 2019թ. ավարտել է նաև Երևանի կոնսերվատորիայի մագիստրատուրան, իսկ 2020-21թթ ֆակուլտատիվ կրթություն է ստացել դիրիժորական մասնագիտությամբ: 2017թ-ից ՀՀ ԿԳՄՍ նախարարության Մշակութային կրթության աջակցության հիմնադրամի հրավիրյալ մեթոդիստ է: Այցելություններ է ունեցել ՀՀ բոլոր մարզեր և Արցախ՝ երաժշտական և արվեստի դպրոցների սաների և ուսուցիչների վերապատրաստման և ուսումնամեթոդական օգնություն ցուցաբերելու նպատակով: Նույն թվականից շվի և դուդուկ է դասավանդում Երևանի Ռ.Մելիքյանի անվան պետական երաժշտական քոլեջում: 2011թ-ից համատեղությամբ աշխատում է Երևանի Սայաթ-Նովայի անվան երաժշտական դպրոցում՝ որպես շվիի և դուդուկի դասատու: 2019թ-ից աշխատում է Երևանի Կոմիտասի անվան պետական կոնսերվատորիայի Գյումրու մասնաճյուղում որպես ազգային նվագարանների ամբիոնի դասախոս: 2013-22թթ որպես մենակատար աշխատել է Հայաստանի ազգային նվագարանների պետական նվագախմբում: 2021թ-ից ղեկավարում է «Նարեկացի» արվեստի միության «Նովա» ժողովրդականն նվագարանների անսամբլը: Դարձել ա տաս միջազգային և հանրապետական մրցույթ-փառատոների դափնեկիր: Ելույթներ է ունեցել Հայաստանի ազգային ֆիլարմոնիկ, Հայաստանի պետական սիմֆոնիկ, Երևանի Ա.Սպենդիարյանի անվան օպերայի և բալետի ազգային ակադեմիական թատրոնի սիմֆոնիկ և Դրեզդենի սիմֆոնիկ նվագախմբերի հետ: Հյուրախաղերով հանդես է եկել Գերմանիայում, Թուրքմենստանում, Ավստրիայում, Ռուսաստանի Դաշնությունում, Ֆրանսիայում և այլուր: 2021թ. հիմնադրել է «Եղեգան փող» 1-ին համահայկական մրցույթ-փառատոնը, որը երկրորդ անգամ անցկացվել է 2023թ.: 2018թ. հրատարակվել է նրա հեղինակած «Պատանի շվիահար», 2020թ.՝ «Ժողովրդական պարեղանակներ զուռնայի համար», 2021թ.՝ «Ազգային նվագարանների համույթներ» ուսումնական ձեռնարկները: 2022թ. Փարիզում ձայնագրվել է 4 ստեղծագործություն, որը տեղ է գտել և թողարկվել «Հայ հոգիներ» ձայնասկավառակում։ 2022-23թթ աշխատել է Երևանի Սայաթ-Նովայի անվան երաժշտական դպրոցում որպես ուսումնական գծով փոխտնօրեն:
