Նոնա Պողոսյան

Բանաստեղծ

Ծնվել է 1962թ. մարտի 6-ին, ՀՀ Շիրակի մարզի Սառնաղբյուր գյուղում: Վեց տարեկան հասակից տեղափոխվել է բնակության ՀՀ Արագածոտնի մարզի Պռոշյան ավան: 1979թ. ավարտել է տեղի միջնակարգ դպրոցը: Գրական առաջին քայլերն սկսել է «Պիոներ-Կանչ» թերթից, ուր տպագրվել են նրա մանկական բանաստեղծություններն ու պատմվածքները: 1984թ. ավարտել է Երևանի պոլիտեխնիկական ինստիտուտի տեխնիկական կիբեռնետիկայի ֆակուլտետը: 1985-88թթ աշխատել է մասնագիտությամբ: 1987թ. ավարտել է Մոսկվայի օտար լեզուների պետական դասընթացի գերմաներենի բաժինը: 1989-93թթ աշխատել է լրագրության բնագավառում` որպես լրագրող, միաժամանակ թղթակցելով տարբեր լրագրերի և ամսագրերի: 1992թ. «Ուրբաթ» շաբաթաթերթում տպագրվել է նրա «Տեր, փրկիր դու քաղաքն այս ծեր» պոեմը, ապա լույս է տեսել «Ձյունե աղոթք» բանաստեղծությունների առաջին ժողովածուն: Լույս է տեսել նաև նրա «Միջօրեի ոտնաձայները» (2006թ.), «Անսրբագիր ներկայություն» (2010թ.), «Ապրելու կանխավարկած» (2014թ.) բանաստեղծությունների ժողովածուները: Նրա բանաստեղծական շարքերը թարգմանվել են պարսկերեն, գերմաներեն: 2007թ-ից Հայաստանի գրողների միության անդամ է: 1993թ-ից ծառայում է ՀՀ պաշտպանության նախարարությունում, ՀՀ ԶՈւ պահեստազորի փոխգնդապետ է, արժանացել է բազում պարգևների և մեդալների: