Վիգեն Թադևոսյան

Գեղանկարիչ

8 հունվար, 1943 - 23 հոկտեմբեր, 2010

Ծնվել է Երևանում: 1970թ. ավարտել է Երևանի Խ.Աբովյանի անվան պետական մանկավարժական ինստիտուտի էսթետիկայի ֆակուլտետը: 1981-84թթ եղել է «Գարուն» ամսագրի գեղարվեստական խմբագիրը: 1990-2000թթ հանդես է եկել նաև որպես համադրող, այդ թվում՝ 1995թ․ Գերմանիայի Բոխում քաղաքում «Հայաստան. հինավուրց մշակույթի երկրի վերաբացահայտումը» ցուցահանդեսում: Առաջիններից է մասնակցել 1988թ. Արցախյան շարժմանը: 1990-ականներին արվեստի թեմայով դասախոսություններ է կարդացել Ավետիք Իսահակյանի տուն-թանգարանում: 1996-2001թթ «Աննա Հովնանյան» արվեստի դպրոցում վարել է արդի արվեստի պատմության մասին դասընթացաշար և ունեցել մեծ ազդեցություն Հայաստանի ժամանակակից արվեստի զարգացման վրա: Եղել է իր ժամանակի արվեստի նշանավոր դեմքերից, արվեստի վերացական ուղղության հիմանդիրներից մեկը Հայաստանում: Եղել է հայկական մոդեռնիզմի և ժամանակակից արվեստի կամուրջներից մեկը: Իրերի խորքը թափանցելու կարողությունը, առաջնայինը երկրորդականից տարբերելու սուր զգացումը, նրբացված, կիրթ ճաշակը հատկապես զգալի են նկարչի գրքային գրաֆիկայում: Ձևավորել է Քամյուի, Մարկեսի, Հեսսեի, Լորկայի գրքերի նկարազարդումները, որը եղել է այդ գրողներին խորապես հասկանալու, նրանց աշխարհը թափանցելու եւ խորքը վերհանելու լուրջ փորձեր ժամանակակից հայ գրքարվեստի մեջ: Մահացել է Երևանում: