ԱՍԱՏՈՒՐ ՊԶՏԻԿՅԱՆ

Գեղանկարիչ, գրաֆիկ

Ծնվել է 1943թ. օգոստոսի 12-ին, Բեյրութում: Սովորել է Պերուջայի գեղարվեստի ակադեմիայում և Փարիզի գեղարվեստի ազգային բարձրագույն դպրոցում: Աշխատում է գեղանկարչության և գրաֆիկայի (մասնավորապես՝ փորագրության) ասպարեզներում: Ստեղծագործել է գերիրապաշտական (սյուրռեալիզմ) ուղղությամբ: Նրա նկարներում ավերված շենքերի բեկորները, կանանց երկրաչափականացված մարմինները, դիմակները, անեզր տարածությունները յուրովի արտահայտում են ժամանակի լարվածությունը, անորոշությունը, պատերազմի սարսափները («Սպասում», «Խաչից իջեցնելը», «Նոկտյուրն», «Մտորումներ» և այլն): Լիբանանի ողբերգական իրադարձությունները իրենց կնիքն են թողել նկարչի ստեղծագործական նկարագրի վրա: 1980թ. Հայաստանի ժամանակակից արվեստի թանգարանին է նվիրաբերել իր տասը փորագրությունները, որոնցից են՝ «Արևամուտ» (1976թ.), «Սահման» (1977թ.), «Ռեքվիեմ մեռած քաղաքին» (1980թ.) և այլն: Անհատական ցուցահանդեսներ է ունեցել Բեյրութում (1968թ., 1975թ.), Փարիզում (1970թ., 1977թ.), Հռոմում (1974թ., 1976թ.), Ամստերդամում (1978թ.), Ֆլորենցիայում (1979թ.) և այլուր: Ապրում և ստեղծագործում է Փարիզում: